Pagpapalit ng liderato, isinagawa ng Infanta National High School
Dumalo ang Punong Bayan ng Infanta, Mayor Lord Arnel L. Ruanto, kasama sina Vice Mayor Mannie A. America at mga miyembro ng Sangguniang Bayan, sa isinagawang seremonya ng pagpapalit ng Punong-Guro ng Infanta National High School (INHS).
Pormal na inilipat ni Dr. Calixto S. Blazo ang responsibilidad at pamumuno ng INHS sa bagong Punong-Guro na si Dr. Reynaldo V. Nanong, Principal IV.
Ang naturang seremonya ay dinaluhan din ng Punong Bayan ng Lucban, Quezon na si Kgg. Agustin “Ten-Ten” M. Villaverde, kasama ang mga miyembro ng Sangguniang Bayan ng Lucban, bilang suporta sa mga pinuno ng edukasyon ng kanilang bayan.
Nagpaabot ng taus-pusong pasasalamat ang mga guro, mag-aaral, at buong pamunuan ng Infanta National High School kay Dr. Calixto S. Blazo sa kanyang naging paglilingkod at mga naiambag sa paaralan. Matapos ang kanyang panunungkulan sa INHS, siya ay uuwi sa bayan ng Lucban, Quezon upang gampanan ang kanyang bagong tungkulin bilang Punong-Guro ng Lucban Integrated School.
Samantala, kasama ang mga kawani ng DepEd Lucban at mga kaguruan ng Lucban Integrated School, sinamahan sa bayan ng Infanta si Dr. Reynaldo V. Nanong na ngayon ay itinalaga bilang bagong Punong-Guro ng INHS.
Taus-pusong tinanggap ng Infanta National High School at ng buong bayan ng Infanta si Dr. Reynaldo V. Nanong bilang ika-16 na Punong-Guro ng nasabing paaralan.
Sa kanyang mensahe, nagpahayag ng taos-pusong pasasalamat si Mayor Lord Arnel L. Ruanto kay Dr. Calixto S. Blazo sa kanyang pamumuno at mga isinagawang reporma sa paaralan. Mainit din niyang tinanggap si Dr. Nanong at tiniyak ang buong suporta at kooperasyon ng lokal na pamahalaan sa mga paaralan para sa patuloy na pag-angat ng kalidad ng edukasyon sa bayan ng Infanta.
