AUTISM CONSCIOUSNESS RAISING CAMPAIGN

Isinagawa ngayong araw sa Niyogyugan Training Center ang Autism Consciousness Raising Campaign na may temang “Understanding Autism: Building an Inclusive Community,” sa pangunguna ni G. Liezel Pilotin ng Persons With Disability Affairs Office (PDAO).

Katuwang sa aktibidad na ito si Gng. Amanda Madreleno, Project Officer ng Save the Children, sa pakikipagtulungan ng iba’t ibang ahensya at organisasyon kabilang ang LGU Infanta, PDAO, Save the Children Philippines, at ADG Behavioral Center.

Nagbigay ng mahahalagang kaalaman, karanasan, at pananaw ang mga tagapagsalita na sina Mr. Armando at Mrs. Glycel Moises ng ADG Behavioral Center/ABA Psychological Services, gayundin ang mga magulang ng mga indibidwal na may autism na sina Mrs. Marilyn Hernandez, ina ng isang 14 na taong gulang na batang may autism, at Mr. Ronald Ofilan, Project Officer ng Save the Children Philippines.

Layunin ng adbokasiyang ito na palakasin ang pagtutulungan ng pamahalaan, mga non-government organizations, at ng komunidad upang makabuo ng inklusibo at sustenableng mga programa at serbisyong magpapalawak ng kaalaman at pag-unawa sa Autism Spectrum Disorder (ASD), at magtataguyod ng isang mas makatarungan at makataong komunidad para sa mga batang may autism at kanilang mga pamilya.

Patuloy na isinusulong ng pamahalaan ang mga programang nagbibigay-diin sa pag-unawa, pagtanggap, at pagkakapantay-pantay para sa mga batang may autism at kanilang mga pamilya. Sa pamamagitan ng sama-samang pagkilos ng pamahalaan, mga organisasyon, at ng komunidad, binubuo natin ang isang Infanta na inklusibo, makatao, at may malasakit sa lahat.